Sa interview sa DXDC RMN Davao kang Merlyn Largo, inahan sa na-missing nga Arniel Largo, iyang gibutyag nga gahapon, May 2, nakita ang iyang anak sa Brgy. Mangayon, Compostela kinsa hangtod karon blangko lang gihapon ug dili pa mastorya og tarong.
“Nag-alsa man gud siyag kanding, ila daw untang bunalan. Naalaan og kawatan kay ang kanding gidala lagi. Unya pagtan-aw sa nawung, mao man daw ang gi-post nga na-missing. Mao to ilang gidakop, gidala sa barangay ug gipakaon. Kaluoy sa Ginoo nauli gyud,” sulti pa sa inahan.
Sa katapusan, gibarugan gihapon sa pamilya ang ilang pagtuo sa mananagna nga gidagit gyud kini sa engkanto ug giingong gitagoan sa punoan sa balite tungod sa katingad-an niining mga lihok ayha pa man kini nawala.
Hinuon, mapasalamaton ang inahan nga anaa ra sa luwas nga kahimtang ang iyang anak sa dihang nauli sa ilang panimalay.
