Davao City – Gitindogan karon sa executive department sa gobyerno nga ang mandato sa atong batakang balaud nagtagana nga kargo sa Commission on Human Rights (CHR) imbestigahon ang tanang kalapasan sa tawhanong katungod ug dili niadtong gikalambigitan lamang sa mga awtoridad.
Sa usa ka media interview, gisugilon ni Presidential Legal Counsel Salvador Panelo nga usa ka misreading ang claim nga solamenteng mga abuso lamang sa mga ‘state actors’ ang covered sa naasoyng constitutional directive ngadto sa CHR.
Dugang ni Panelo, responsibilidad usab sa maong komisyon nga motunol ug legal services sa tanang buot modangop sa gobyerno mientras giklaro sa legal officer nga walay malisya sa gikabangi-og nga P1,000 a year budget sa komisyon alang sa 2018.
“The president can veto on any provision as an exercise of his executive functions,” segun kang Panelo.
Pikas bahin, gitataw ni Jackie de Guia, CHR spokesperson nga ang P1,000 budget proposal usa ka direktang hulga sa integridad ug independencia sa nasangpit nga ahensyang gitahasan sa balaud nga manalipod sa interes sa katawhan.
Matud ni De Guia, mismong ang Konstitusyon nagtagana nga dili kini ipailawom sa executive o legislative departments aron makabarug kini nga may kaugalingnan panahon sa pagpatuman sa iyang mandato ubos sa organic law.
Dugang sa tigpamaba sa CHR nga ang panawagan nga mokanaug sa pwesto si CHR Chair Chito Gascon makonsidera nga usa ka hadla sa independencia sa komisyon ug nga ang resignation dili gayud option sa hepe sa komisyon ning mga panahona.
RadyoMan June Duterte
