Anay alkalde nga nagpalupok sang armas, ginpasakaan na sang kaso

143

President Roxas, Capiz – Ginpasakaan na sang kaso nga alarm and scandal ang anay alkalde sang banwa sang President Roxas, Capiz nga si Ramon Locsin matapos gin-aresto sang mga katapo sang Provincial Mobile Force Company. Si Locsin ang naaktuhan sang mga kapulisan nga nagpalupok sang iya armas sa Resources Services Livelihood (RSL) Center sa Barangay Cabug-Cabug, sang nasambit nga banwa.
Natigayon nga mapasaka ang kaso pinaagi sa regular filing sa Provincial Prosecutors Office batuk sa anay alkalde nga si Don Ramon Locsin, 73 anyos sang Ilang-Ilang Locsin Street, Barangay 5, Silay City, Negros Occidental.
Suno kay Police Col. Canilo Fuentes, Provincial Director sang Capiz Police Provincial Office, ginhimo ni Locsin nga firing range ang likod nga porsyon sang Livelihood Center nga ginapag-iyahan sang munisipyo.
Narekober sang mga kapulisan ang duha ka .40 caliber pistol, mga magazine kag bala sa mga kamot ni Locsin.
Padayon naman nga gina-verify sang mga otoridad kun balido ang permit to carry firearm nga ginpakita sang anay alkalde.
Sa ti-on nga mapaslawan si Locsin, mahimo nga mapasakaan man ini sang kaso nga Illegal Possession of Firearm.
Sa karon, naka-hospital arrest sa gihapon ang anay alkalde matapos naglain ang pamatyag sini kasunod sang pag-aresto sa iya.

Facebook Comments

From Advertisers