Pilar, Capiz – Nagapangatubang sang criminal complaint sa Office of the Ombudsman Visayas sanday anay Pilar Mayor Gideon Ike Patricio upod ang anak sini nga si incumbent Sangguniang Bayan Member Mitchelle John Patricio, kag ang mag-asawa nga sanday Ma. Paz Patricio-Fernandez kag Leonard Fernandez sang Barangay Poblacion, Pilar, Capiz.
Ini ang ginkumpirmar ni Pilar Municipal Administrator John Heredia. Suno diri nga siya mismo ang nagpadulong sa Office of the Ombudsman agud ipasaka ang complaint nga paglapas sa Republic Act 3019 ukon Anti-Graft and Corrupt Practices Act, Swindling kag Falsification of Public Document sa idalom sang Revised Penal Code.
Magluwas diri, ginpasakaan man sang administrative charges ang mag-amay nga sanday anay Mayor Gideon Ike kag Mitchelle bangud sa Gross/Grave Misconduct, kag Conduct Prejudicial to the interest of the Service.
Ginpahayag dugang ni Heredia nga nag-ugat ang reklamo sang natukiban sang Transparency and Accountability Task Force sang nasambit nga banwa nga may iregularidad sa donation sang duta sang mag-asawa nga Fernandez sa lokal nga gobyerno sang Pilar.
Suno pa kay Heredia nga ang gindonar nga duta sang mag-asawa nga Fernandez ang wala sang nagakaigu nga titulo kag ini ang ginpanag-iyahan sang bangko bangud na-imbargo ini sang ginprenda ni anay Mayor Patricio.
Gindugang man sini nga ang nasambit nga duta ang ginpatindugan sang multi-purpose hall nga ginpondohan sang 2 milyones pesos nagikan sa munisipyo sang Pilar nga sang ulihi gindonar pa gid ni Patricio sa LTO nga sa karon ginagamit nga Extension Office sang amo nga ahensya.
Nagagwa man suno kay Heredia nga nabutang sa alang-alang ang pondo sang banwa bangud may iregularidad sa donation sang duta.
photo from web
<www.avast.com/sig-email?utm_medium=email&utm_source=link&utm_campaign=sig-email&utm_content=webmail>
