Davao City – Gibarugan karon ni Presidential Communications Operations Office (PCOO) Sec. Martin Andanar nga desidido ang administrasyong Duterte nga batukan ang kurapsyon, kriminalidad ingon man ang pagkuyanap sa droga.
Sa interbyu kaniya atol sa programang ‘Straight to the Point’ uban ni RadyoMan June Duterte, gibutyag sa kalihim nga walay pagapilion ang nahisgotang kampanya: Mapa-tawong simbahan man, mapa-personahe o mapa-opisyal sa gobyerno.
“Ang atong presidente will never waiver against (the) war against corruption, criminality and drugs and (will) just work hard to eliminate poverty in the country,” segun ni Andanar.
Reaksyon usab kini sa hepe sa PCOO ning labing ulahing kontrobersyal nga pamahayag sa pamuno-nasud diin iyang gibahad nga dili siya magpanuko paglunggo sa ulo sa mga obispo sa Simbahang Romano Katoliko kun mapamatud-ang nagdula kini sila sa iligal nga droga.
Kahinumdoman nga sa usaka speech dinhi sa syudad sa Davao atol sa inagurasyon sa Davao Bulk Water Project, gi-akusahan sa pangulo ang usa ka obispo nga nahilambigit sa kurapsyon sanglit nangayo kini og sakyanan ngadto sa usa ka dakung opisyal sa gobyerno.
RadyoMaN Jason Amisola
