Davao City – Miani og batikos gikan sa mga netizens ang duha ka lalake kinsa midabdab sa iro nga dakung buhi, kini subay sa video nga gipost sa RMN Davao nga nag-viral karon sa Facebook.
Makita sa video nga gihiktan og pisi ang li-og sa iro ug gibitay sa kahoy samtang gikalayohan ang lubot samtang duha ka lalake nagpaabot ilawom sa balay kanus-a mapaig ug mamatay ang binuhi.
Mabati sa conversation sa video nga giistorya sa usa ka lalake kinsa nagpaila nga tag-iya nga basta ang iro mangunay og amo dapat dabdaban, ihawon ug kan-on.
Dihang nabantayan sa wala mailhing nga lalake nga gikuhaan sila og video sa nagpakabanang lungsoranon paspas sila nanibat maong wala na sila madakpi pa sa mga pulis nga miresponde sa lugar sa Talomo.
Subay sa Section 6 sa Animal Welfare Act of 2007, ang paglitson nga buhi sa iro makunsidera kini nga usa ka matang sa sinalbahis ug pagmaltrato sa mananap ug kini dunay silot nga pagkapreso ug multa.
Alayon niini, nanghunaw karon ang Davao City Veterinarian’s Office pinaagi sa pagsulti nga dili apil sa ilang trabaho ang pagpatuman sa balaud sanglit mas nagtutok sila sa kampanya kontra rabies.
Sumala sa Livestock Dispersal Officer sa City Veterinary Office nga si Naomi Ruth Aquino nga walay labot sa ilang programa ang pag-edukar sa publiko mahitungod sa katungod ug proteksyon sa mga mananap.
Gipasa ni Aquino ngadto sa kapulisan ang pag-edukar sa katawhan sa balaud ug pagdakop sa mga magdagmal og mananap sama sa iro sanglit dili nila trabaho ang pagpatuman sa balaud.
Apan mabasa sa Section 7 sa Republic Act 94821 kun Anti-Rabies Act of 2007 sa aspetong ‘Responsibilities of LGU’ nga apil mutabang ang kagamhanang lokal pinaagi sa City Veterinarian’s Office sa pagpatuman sa balaud kontra sa mga mang-abusar og mananap apil na ang mga iro.
RadyoMaN Joel Viray
