Amediante el caliente controversial perdicion del 10 truck de asucar y arroz na finger wharf na Baliwasan del otro semana, 7 del 10 maga tsuper del truck el ya somete el diila affidavit con el pulis hablando ya descarga otravez sila con el maga saco na jungkung ala noche del Martes.
Na report del pulis ta aparese Lunes na differente hora ya llega el 10 maga truck na Taha Wharf y ya carga con el maga saco de asucar y arroz desde na un jungkung.
Pero alamaniana ya ataha canila el maga pulis na checkpoint na Baliwasan Seaside porcausa nohay papeles el maga tsuper.
Ya precura maga pulis na encabesamiento di Sr. Supt. Neri Vincent Ignacio entrega con el maga truck lleno de asucar y arroz na Bureau of Customs, pero nohay accepta el ofesina.
Ya tene que aguanta el maga pulis con el 10 maga truck y ya pone adentro del mencionao finger wharf esperando si cuando accepta el BOC.
Ya bisya tambien el maga pulis afuera del checkpoint para gende puede sale el maga truck.
Pero na affidavit del 7 maga tsuper ya habla estos cay ala noche de Martes tiene maga pulis ya conversa canila pero nohay sila habla si cosa el diila conversacion.
Donde ya tene sila que descarga otravez con el maga saco de asucar y arroz na jungkung y despues ya sale ya sila na lugar cuando ya pasa sila na checkpoint nohay mas canila aguanta el maga pulis cay nohay mas laman el diila maga truck.
