Davao City – Gihingusgan karon sa Department of Education 11 (DepEd) ang istriktong pag-implementar sa anti-bullying law aron masumpo na ang bullying incidence sa mga tulonghaan sa tibuok nasud sa Pilipinas.
Kini ang gisabwag nga komento ni DepEd 11 Spokesperson Dodong Atillo subay sa nahitabong bullying sa taekwondo black belter nga si Joaquin Montes sa kaparehong estudyante niini sa Ateneo Manila nga nag-viral sa social media.
Suma ni Atillo, ang Anti-Bullying Law hugot kini gipatuman sa pampubliko ug pribadong mga tulonghaan sa rehiyon XI ug usa kini sa bug-at nga rekisitos ayha mahatagan og certification ang eskwelahan.
Giangkon ni Atillo nga dinhi sa rehiyon onse aduna sa’y mga insidente sa bullying ug gani ang ilang rehiyunal nga buhatan kanunay makadawat og reklamo sa maong panghitabo.
Ug mao kining rason ngano istriktong gi-imposar sa mga tulonghaan sa pampubliko o sa pribado ang naasoy nga balaod sa katuyoan nga mapanalipdan ang mga kabataan gikan sa bully.
Gitulisok ni Atillo ang mga gikininan mismo tungod sa dili maayo nga pagpadako ug paggiya sa ilang mga kabataan mao nang pag-abot sa eskwelahan dali ra kanila mang-bully og classmates nga walay ikasukol.
Ang gibuhat ni Joaquin nga iyang gikulata ang usa ka estudyante gitawag na nga bullying busa angay mulihok ang pamunuan sa Ateneo Manila aron dili na masubli pa ang nasangpit nga panghitabo.
RadyoMaN Joel Viray
