Davao City – Wala magustohi ni Victims of Injustice Criminality and Terrorism in Mindanao (VICTIM) Convenor Arthur Tariman ang wala pagtamod ni Pres. Rodrigo Duterte sa ‘rule of law’ diha sa kampanya kontra droga.
Wala makuntento si Tariman sa kadumalahan ni Duterte tungod ginakomkom niini ang balaod diin timailhan kini sa usa ka lider sa usaka diktadurya.
Ug kung aduna ma’y gibiliban si Tariman kini mao ang iyang kaisog diha sa pagdeklara sa CPP-NPA-NDF nga terorista apan gibarugan sa Anti-Com Crusader nga dili kini pabor sa palisiya sa pangulo.
Dili motoo si Tariman sa resulta sa survey sa SWS ug Pulse Asia sa katarungan nga pwede ra kini manipolahon subay sa mandar sa nagbayad sa survey.
Gikontra pa ni Tariman ang 1,200 ka respondents sa Pulse Asia kay wala kuno kini nagpresenta sa kapin usa ka gatos ka milyon nga populasyon sa Pilipinas.
Nagduda ang anti-com crusader nga ang 80% trusting rating ni Duterte nakuha niya kini sa mga lugar diin popular siya ug mi-uyon sa iyang mga palisiya.
Apan gipamugos niini nga dili kasaligan ug katohoan ang mga resulta sa mga survey sa duha ka higanting survey institution nga daw ginapahumot ang kagamhanan sa publiko.
Alang ni Tariman, sayo pa aron masulti kun maayo ba o dili ang liderato ni Duterte sanglit buot una niini makita ang resulta sa TRAIN Law hangtud sa 2019 ug dinha na kini maghukom.
Hinoon kun ikumpara si Duterte ug si kanhi Pres. Noynoy Aquino layo ra kaayo tungod ang kanhi mayor determinado samtang ang labaw sa ‘yellowtards’ talawan.
RadyoMaN Joel Viray
