Davao City – Gikontra sa Victims of Injustices Criminality and Terrorism in Mindanao (VICTIM) ang bag-ong saad ni Pres. Rodrigo Duterte nga humanon ang suliran sa droga sulod sa laing usa ka tuig nga lugway.
Gibutyag ni VICTIM convenor Arthur Tariman nga maglisod si Digong sa pagtuldok sa problema sa droga sa punto nga nakagamot na kini og maayo sa atong nasud.
Gipahinumduman ni Tariman ang pangulo sa kalawom sa suliran sa droga ug gani tulo na ka dekada milabay ug pila na sab ka administrasyon ang miagi apan hangtud karong wala pa gihapon masumpo ang problema.
Gipasidan-an pa niini ang kagamhanan nga dili dali-dalion ang pagbalik sa war on drug ngadto sa kapulisan kay basin dili makaya ang pressure ug musangko na pod hinoon sa extra judicial killing (EJK).
Gisukmatan pa sa convenor ang presidente ngano hangtud karon wala pa makasuhi ang mga politiko ug mga heneral nga nalakip sa iyang druglist nga hagbay raman niya kini gibansiwag sa publiko.
Mas mibilib pa kini sa Philippine Drug Enforcement Agency (PDEA) tungod sa duha ka bulan nga gipangunahan ang kampanya dinagko ang accomplishment apan dili maduguon ug dili pareho sa Philippine National Police (PNP) nga mikutlo og daghang kinabuhi.
Mahulog nga walay pulos ang giyera kontra droga kung ibalik kini sa nasudnong kapulisan nga walay mahitabo nga kausaban sa parte sa mga otoridad.
Bisan pa makapila utrohan ang pamaagi sa oplan tokhang ug sa operasyon mahitabo gihapon ang pamatay sa war on drug kung magpabilin nga dunot ug kriminal ang pangutok sa mga tinugyanan sa balaod.
Gitulisok sa Anti-Communist Crusader usab ang pagkamapasagaron sa mga opisyal sa kapulisan kay ila lamang gisalig sa mga PO1 ang anti-drug operation resulta nahimong maduguon ang war on drug ni Pres. Rodrigo Duterte.
RadyoMaN Joel Viray
