El Commitee Chairman del Anti Drugs na consejo local Hon. Jerry Perez ya comenda con el liderato del Philippine Drug Enforcement Agency (PDEA IX) que ta encavesa el Director III Atty.Lyndon P. Aspacio, por el diila exemplaryo trabajo na campanya contra droga ilegal aqui na ciudad de Zamboanga que recientamente ya resulta na confiscacion del un kilo de shabu con cantidad de singco milyones de pesos y aresto del singco suspechao durante el un operasyon que ya conduci banda alas-tres por la tarde del November 3,2017 na vicinidad del Gov.Camins Ave, Canelar.
Si Perez ya abla cay un grande acomplisemiento el cosa ya hace el PDEA y comendable este esfuerzo que debe aprecia el oficiales del fueblo.
Asegun con Director,Aspacio, el ya aresta sila mga persona amo canda Din-din Ronie y Ammad, 30,de Tiptipon, Panglima Estino, Sulu; Dismar Gulam y Asanji, 23 de Siit, Panamao, Sulu; Jamesar Abdulmaid y Abduljalim, 33 de Bangday, Panamao, Sulu; Jamesar Hussin y Kari, 33 de Kanukol, Panamao, Sulu; y si Binnajar Hadjili y Ejiram, 30 de Bangday, Panamao, Sulu.
Ya fuede tambien confisca durante el operasyon amo el beinte (20) pakete de shabu, con fesadez de (1) kilo con el estimao cantidad de Php5,000,000.00, um (1) azul economy bag, y cash dinero que ta suspecha drug money na cantidad de P347,900.00 chene pa un bundle del se llama “boodle money”. El mga suspechao detenido aura na karsel del PDEA IX.-Bhong Simbajon/RMN News
