Davao City – Kutob na lang sa may dalang Bolton ang mga nagmartsang mga militanteng grupo human nga wala na sila tugoti sa mga awtoridad nga makalahos pa.
Gitin-aw ni Davao City Police Office (DCPO) head Senior Superintendent Alexander Tagum nga gibabagan na nila ang mga raliyista nga planong ipadayon ang ilang lihok protesta sa Rizal Park tungod kay wala na kiniy permit o permiso sa lokal nga panggamhanan.
“Ang allowed lang para sa ilang rally for them is sa Freedom Park so kung mag-rally sila sa Rizal Park which is in front sa City Hall kinahanglan na nila mu-apply og permit to conduct rally kung wala silay permit nga na-request unya mag-insist og mag-conduct og rally then we can take down the rally considering nga iligal ang ilang assembly,” sumala ni Tagum
Matud ni Tagum nga hapsay ang syudad ug wala usab nakitang mga bayolasyon ang kapulisan atol sa aktibidad sa mga progresibong pundok.
Sa pikas bahin naitok ang mga nagmartsang mga raliyista human nga wala na sila matugutang makalahos pa.
Segun ni Karapatan Southern Mindanao Region (KSMR) Secretary General Jay Apiag nga dismayado sila wala na nila matapos pa ang ilang aktibidad sa Rizal Park atol sa ika-46th nga kasumaran sa deklarasyon sa balaod militar.
“Gipakita gyod kung unsa ka pasista ang mga sundalo ug mga kapulisan dinhi sa Davao City inubanan sa ilang Mayor nga si Mayor Inday Sara Duterte…we more than dismayed and disgruntled sa ginaingon nga tapang at malasakit grabe ang pagpangatik sa katawhan nga para sila sa katawhan. Atong ma-remember ang programa nga gikan dinhi nga Gikan sa Masa dili nato mabati sa pagkakaron kay bisan ang katungod sa atong pagpasibaw sa atong gibati bisan kana lamang nga pag-ila wala gayod nila giila,” sumala ni Apiag.
Sumala ni Apiag nga usa sa ilang gisinggit atol sa ilang programa mao ang ilang pagbabag sa gilaraw sa gobyerno nga paglugway sa balaod militar sa Mindanao.
Samtang gikumpirma ni Task Force Davao Commander Col. Nolasco Mempin nga adunay upat ka mga behikulo diin sakay ang gituohang musalmot sa rally nga wala matugutang makaentra sa dakbayan atol sa checkpoint sa Lasang ug Sirawan tungod sa mga traffic violations sama sa ‘out of line’, overloading ug kulang usab ang mga dokumentos.
RadyoMaN Aimee Guinita
