Davao City – Wala mahimuot ang grupong Anti-Epal sa Philippine National Police gumikan sa paggamit og Long Range Acoustic Device (LRAD) atol sa rally sa mga militante sa 31st ASEAN Summit niadtong Lunes.
Gibutyag ni Anti-Epal convenor May Paner nga dakong sayop ang gibuhat sa kapulisan nga migamit sila og Sonic Weapon sa pagbungkag sa rally sa mga militante atol sa ASEAN Summit 2017.
Gikanayon ni Paner nga dili lang ang mga nagprotesta apektado sa tingog LRAD apan lakip na ang mga riot police nga miharang sa mga militante kinsa buot makaabot sa venue sa ASEAN Summit.
Matud ni Paner nga kung gipasagdan lang sa mga pulis ang mga militante nga makapasibaw sa ilang mga mulo wala unta misangko sa bayolente ang dispersal ug pagyatak kini sa katungod sa mga nag-rally.
Kumbinsido ang lead convenor nga hagbay ra giandam sa kapulisan ang LRAD ug gitagana kini alang sa mga militante butang nga dili makatarunganon sa mga igo lang daw nagpasibaw sa kabigwaos.
Batbat pa ni Paner, ang pagdagmal sa mga tawo nga igo lang unta nagpalanog sa ilang sintiyemento ug pagpatay sa mga tawo nalambigit sa droga buhing basehan nga wala matuman ni PRRD ang iyang saad nga respetohon ang matag katungod sa mga pilipino.
Dugang pa niini nga walay kalainan si Presidente Duterte sa nanglabay nga mga Pangulo sa nasud kung diin nagpakita usab matud pa sa kamangtas sa pagkitil sa tawhanong katungod sa mga militante.
RadyoMaN Joel Viray
