Davao City – Gisuportahan karon sa usaka kanhi opisyal sa Inter-Agency Council for Traffic (I-ACT) ang laraw karon sa Konseho ning siyudad sa Davao nga magpanday og ordinansang magdili na sa paggamit og gadgets samtang nagtabok sa mga pedestrian lanes.
Sumala ni kanhi I-ACT Deputy Executive Director Elmer Organo, usa ka maayong lakang ang plano sa Konseho nga i-ban ang paggamit sa gadgets sama sa cellphones ug mga earphones ug headsets kun mulabang diha sa pedestrian lanes.
Segun ni Organo, daku’g ikatabang ang gitinguha nga ordinansa sa pagmentenar sa road safety kun kaluwasan sa mga tawo nga mutabok sa pedestrian lanes maingon man sa panginabuhi sa mga PUJ drivers.
Gipasabot ni Organo nga dunay lahi-lahi nga hinungdan sa mga mahitabong disgrasya sa kadalanan apan usa sa dakung rason mao kining kapakyas nga mamahimong alerto kun mabinantayon samtang anaa naglakat sa kadalanan.
Ang hapsay nga dagan sa trapiko mosangpot gayud sa paglikay gikan sa mga disgrasya pinaagi sa disiplina sa mga commuters ug sa tanang drivers sa pampubliko ug pribadong behikulo.
Ang road safety angay itudlo diha sa mga tulonghaan gawas pa sa education campaign sa Disaster Risk Reduction & Management kansang tumong mao nga ma-edukar ang tawo diha sa tips sa ensaktong paggamit sa pedestrian crosswalks.
RadyoMaN Joel Viray
