Davao City – Nagkadaghan na ang mga lungsod ug mga probinsiya sa area of responsibility sa 10th Infantry Division Philippine Army ang nagdeklara og persona non grata sa teroristang CPP-NPA-NDF.
Sa datos sa 10th ID, ang mga lungsod sa Talaingod Davao del Norte, Mabini sa ComVal , Magpet North Cotabato, San Luis Agusan del Sur, probinsiya sa ComVal ug Davao Oriental nagdeklara sab og persona non grata batok sa mga komunista.
Ang Barangay San Isidro sa Tagum City ug ang barangay sa 3rd district sa siyudad sa Dabaw ug usa ka sitio misunod sab sa pagdeklara og persona non grata batok sa NPA.
Samtang dili na sab welcome sa lungsod sa Jose Abad Santos Davao Occidental ang maong grupo.
Suportado sa 10th ID Philippine Army ang lakang sa mga lokal opisyales batok sa teroristang grupo sanglit ang pinakatumong sa kawsa mao man ang pagpanalipod sa katawhan gikan sa kaaway sa kagamhanan.
Matud ni 10th ID Spokesperson Captain Jerry Lamosao nga sakto lang ang gibuhat sa mga opisyales nga ilang gihinginlan sa ilang mga lugar ang mga kumunista human sila nahigmata sa kamatooran.
Gibatbat pa ni Lamosao nga babag sa kalinaw ug kalamboan ang presensiya sa CPP-NPA-NDF diin ang paglupig sa insurhensiya mao lang ang panaghiusa sa pagbarog sa kamatuoran batok sa dunot nga ideolohiya sa mga komunista.
Niini, gidayeg ni 10th ID General Officer In-charge Brigadier General Mario Lacurom ang kaisog sa mga opisyales sa mga lokalidad kay wala gyod sila nagpadala sa hulga ug kakuyaw sa ilang kinabuhi diin dako kining tabang aron hingpit buntugon ang CPP-NPA-NDF sa nasud.
Malaumon si Lacurom nga mas madugangan pa ang mga lugar sa ilang area nga musunod sa paghimo sa ingon nga lakang aron sa ingon wala na’y kataguan ni makadangop sa komunidad ang maong mga komunista.
Samtang, gipasalig ni Lacurom nga ilang bantayan ang mga lungsod ug mga barangay nga nagdeklara og persona non grata aron dili na sila balikan ug tugawon sa kasumok sa mga NPA.
RadyoMaN Joel Viray
