Davao City – Gitratar sa Alliance of Concerned Teachers kun ACT-Davao City chapter nga pagpatay sa kagawasan sa pagpadayag ang gipanday sa konseho ning siyudad nga ordinansa nagtumong sa hugot nga pagdili sa kalihukan sama sa lihuk-protesta nga himoon diha sa mga dalan ning siyudad.
Gikunsidera ni ACT-Davao Davao President Reynaldo Pardillo nga paghikaw sa katungod sa pagpadayag kun ‘freedom of expression’ ang giduso nga ordinansa nga magbawal sa mga aktibidad sama sa rally nga himoon sa kadalanan.
Nagtoo si Pardillo nga ang balaud sa Pilipinas naghatag og kagawasan sa matag usa nga makasulti sa iyang gibati batok sa gobyerno ug kini puwede ipaagi sa mga lihuk- protesta sa kadalanan.
Dili malimod nga ang gibuhat sa lokal nga gobyerno direktang pangatake batok sa mga igo lang nagsinggit sa ilang gibati tungod sa kawalay katagbawan sa mga migunit sa gahum ug nagpadagan sa kagamhanan.
Gi-ukopar sa mga militante ang national highway sa Panacan dihang ilang giralihan ang Eastern Mindanao Command hinungdan liboan nalangay sa mga lakaw nunot sa ka-trapik sa lugar.
Ug nasubli kini sa nakalabay’ng buwan human gibabaran sa mga sakop sa Kilusang Mayo Uno ang dalan sa Lasang mao nga liboan ka mga commuters nangasuko tungod kay lima ka oras silang natanggong sa dalan.
Busa aron dili na mahitabo ang kahasol nga gimugna sa mga militante ang mga konsehal nagduso og ordinansa nga magregulate sa paggamit sa mga dalan panahon sa kalihukan sama sa rally.
Malaumon si Pardillo nga maimbitar ang mga militante sa mga committee hearings aron mapalanog usab ang ilang bahin alang sa usaka ‘win-win solution’.
RadyoMaN Joel Viray
