Davao City – Normal lang ang reaksyon sa kadaghanan nga dili uyon sa ideya kun konseptong ‘same-sex marriage’ nga suportado mismo ni Pres. Rodrigo Duterte.
Sa pakighinabi kang University of Mindanao – Institute of Popular Opinion (UM-IPO) Director of Quantitative Studies Dr. Adrian Tamayo sa programang ‘Straight to the Point’, gi-ekspektar niya nga mas daghan ang ‘anti’ sa same-sex marriage issue gumikan dili pa kini dawat sa sosyedad ilabina dinhi nga nag-inusarang Kristyanong nasud sa tibuok Asya.
Gisugilon ni Tamayo nga ‘patriarchal society’ ang atong naandan diin sa tradisyunal nga konteksto, ang amahan ang nagadala sa usa ka pamilya.
Dugang sa propesor, gi-recognize nato ang tinguha sa ‘third gender’ nga ‘same-sex union’ ug gilaumang mosangpot kini nga matang sa relasyon sa malinawong panag-uban uban ang panghinaut nga makadugang kini sa awareness sa kadaghanan sa realidad sa presensya karon sa mga LGBTs.
Matud sa academician, adunay movement karon nga nagduso sa pag-tone down sa terminolohiya gikan sa ‘same sex marriage’ ngadto sa ‘civil union’ sanglit dawat man sa mga proponents niini nga dinhi sa Pilipinas, bug-at gihapon ang impluwensiya sa simbahan.
Iya usab nga gipasidaan nga gikinahanglan hinoon ang makuting pagtoon niini gumikan usa sa kritikal nga implikasyon sa maong bag-ong setup kun maaprobahan mao ang pag-usab sa meaning kun depinisyon sa pulong nga ‘family’ diin mao aduna kiniy naandan na nga diwa kun eksplanasyon diha sa atong mga balaud.
RadyoMaN Jason Amisola
