Davao City – Gipailawom na karon sa heightened alert status ang tibuok puwersa sa kapulisan sa Region XI subay sa mando ni Police Regional Office (PRO-XI) Regional Director Gen. Marcelo Morales nunot sa nahitabong suicide bombing incident sa Sulu nga sa mga sundalo ug mga sibilyan.
Matud ni PRO-XI Spokesperson Maj. Jason Baria, tumong sa pag-alerto sa kapulisan mao ang pagpahugot sa seguridad aron dili makasabwag og kasamok ang mga terorista sa bisan asang dapita sa rehiyon.
Segun ni Baria, partikular nga ilang gibantayan kining hometown mismo ni Pres. Rodrigo Duterte diin dinhi nahitabo ang Roxas Night Market bombing pipila ka tuig na ang nakalabay.
Hatud sa talandugon nga hapsay ug kalinaw, lauman ang mas hugot ug istrikto nga chokepoints nga ipatuman sa tanang lugar sa dakbayan sa Dabaw busa hangyo ni Baria ngadto sa publiko ang taas nga pailub ug kooperasyon sa ngalan sa kaluwasan gikan sa hulga sa mga terorista.
Gipasalig sa opisyal nga nagpabiling luwas ang katawhan gikan sa plano sa mga terorista nga magsabwag og kaguliyang ug gipaniguro usab niini nga mapakyas ang mga terorista sa ilang plano nga pagpamomba dinhi.
Panawagan ni Baria sa katawhan nga dili gilayon motoo sa mikuyanap nga messages nga ang mga terorista naglaraw sa pagpamomba sa malls, mga terminal, tulonghaan, merkado publiko ug uban pang mga vital installations.
Hinoon, gibutyag sa tigpamaba nga tuhoan lamang kini kon verified na kini sa kapulisan ilabi na ang tinubdan sa maong mga text messages.
Dugang apelar ni Baria ngadto sa publiko nga magpakabana ug gilayon mo-report ngadto sa mga pulis kun makabantay og kadudahang tawo sa ilang mga barangay aron marespondehan ug masanta gilayon ang dautang laraw niadtong buot muguba sa kahapsay ug kalinaw sa kinatibuk-ang siyudad sa Dabaw ug sa Mindanao.
RadyoMaN Joel Viray
