Davao City – Gibutyag sa Eastern Mindanao Command (EastMinCom) nga ilang buhaton ang tanan aron dili makasulod sa ilang Area of Responsibility (AOR) ang mga teroristang grupo ug labaw na ang mga ‘suicide bombers.’
Kini ang gipasalig ni EastMinCom Spokesperson Major Ezra Balagtey nga ilang paningkamotan nga masanta ang pagsulod sa mga terorista sa ilang AOR ilabi na dinhi sa siyudad sa Dabaw.
Gipaneguro ni Balagtey nga luwas pa gihapon ang kinatibuk-ang Rehiyon Onse ug ang Davao City gikan sa presensiya sa mga terorista ug sa suicide bombers.
Matud ni Balagtey, human mipabusikad sa kaugalingon ang suicide bomber sa military checkpoint sa Brgy. Colonia, Lamitan City, Basilan, alas-6:00 gahapon sa buntag.
Sa nasangpit nga insidente, onse ka tawo ang patay lakip ang upat ka CAFGU ug daghang angol nadala sa ospital diin gituohan sa sentrong bahin sa Lamitan unta pabuthon ang IED apan na-intercept lamang.
Segun ni Balagtey, kun aduna ma’y matigayon nga pagbusikad sa IED dinhi sa atong dapit kana dili buhat sa mga teroristang grupo inay iya sa CPP-NPA-NDF.
Kampante ang tigpamaba nga luwas pa gihapon ang mga dabawenyo gikan sa hulga ug atake sa bisan unta nga terorismo gumikan sa gipakusgan nga siguridad.
Gihatagan pa og pagtagad ni Balagtey ang importansiya sa pag-igmat ug pag-alayon sa publiko ngadto sa kapulisan ug kasundaluhan panahon dunay mamatikdang kadudahang tawo sa ilang mga lugar.
RadyoMaN Joel Viray
