Davao City – Nagpahimangno ang City Government of Davao sa mga reports nga adunay mga indibidwal o mga personalidad nga nagakampanya sa uban nga dili magpabakuna batok Coronavirus Disease 2019 (COVID-19).
Matud ni Davao City Mayor Sara Duterte-Carpio (sa interbyu sa city-owned radio), ilang ginatigom karon ang mga reports ug giindorso sa Department of Health (DOH) o sa National Telecommunication Commission (NTC) ilabi na kung usa ka personalidad sa radio or TV station ang nagakumbinsi sa publiko nga dili magpabakuna.
Apan giklaro ni Duterte-Carpio nga walay ordinansa ang syudad sa Davao nga magsilot niadtong mga nagakampanya nga dili magpabakuna.
“Gina-collate namo ang mga ingon ana nga reports (naga kampanya nga dili magpabakuna) then ginahatag namo sa DOH or sometimes sa NTC para ilang aksyonan especially kung radio station or TV station ang ginagamit nga platform,” sulti sa mayor.
Una nang gipasabot sa opisyal nga boluntaryo ang pagpabakuna ug katungod sa tawo nga mubalibad apan ginapasabot ug gina-edukar gihapon ang nahisgutan sa importansya sa vaccination batok COVID-19.
RadyoMaN Kirby Manzon
