Antibody Rapid test kits nga gipalit sa LGU Iligan, miabot na

Gi-anunsiyo sa kagamhanang lokal sa iligan, pinaagi sa Inter-Agency Task Force on COVID-19, nga miabot na sa dakbayan ang gipalit nga 1,200 ka mga antibody rapid test kits.

Matud pa ni City Health Officer Dr. Cherlina Caṅaveral nga gamiton kini alang sa mga frontliners apan tungod kay limitado, unahon ang mga health workers nga nagpakita og simtomas sa COVID-19 ug mga stranded local individuals o SLI nga nagsugod na sa pagpama-uli sa dakbayan.
Ang laboratoryo sa Gregorio T. Lluch Memorial Hospital o city hospital ang gamiton sa pag-proseso ug pagbasa sa resulta niini.

Miingon si Caṅaveral nga gitakdang magpahigayon og demo ang supplier sa maong test kits nga na-turn-over na ngadto sa city hospital, ubos sa pagdumala ni Dr. Eflieda Valdehueza, ang hospital chief sa GTLMH.


Mihangyo ang mga sakop sa media kagahapon nga mosaksi sa demo o kaha motan-aw sa maong mga test kits apan miingon si Valdehueza nga wala pa mi-update kaniya ang medtech sa laboratory kung naa na kini didto.

Misaad si Valdehueza nga ipakita kini sa media apan wala na maghatag og adlaw kung kanus-a.
Walay fix nga kantidad nga gihatag ang IATF kung tagpila ang pagpalit sa maong mga test kits apan miingon si Patrick Nuṅez, ang Disaster Risk Reduction and Management Officer nga maoy in-charge sa logistics sa IATF, anaa kini sa 1,600 ngadto na sa 1,800 matag test kit.

Kung kahinumduman nga nag-gahin ang LGU Iligan og 10 million pesos alang sa pagpalit og test kits gikan sa kapin 137 million pesos nga Bayanihan Grant for Cities and Municipalities o BGMC fund. (Divina M. Suson, IATF COVID-19 Iligan, May 14)

Facebook Comments