Davao city – Dili na makunsidara nga hulga sa seguridad sa Southeast Asia ang ISIS inspired terrorist Maute group karon nga bungkag na kini human namatay sila Isnilon Hapilon ug Omar Maute.
Sumala ni AFP Chief of Staff General Eduardo Año, bungkag ug nagtibulaag na ang nabiling 30 ka sakop sa teroristang grupo lakip na ang walo ka Indonesian ug Malaysian nationals.
Segun sa heneral, halos katunga sa ektarya sa battle ground na lang ang gitagoan sa mga terorista apan dili undangon sa militar ang operasyon batok sa Maute group.
Dugang ni Año nga dili matud pa pwede mutindog nga lider sa Maute Group ang terorista nga Malaysian National nga si Dr.Mahmud Akmad.
Anaa pa sa battle ground si Achmad apan aduna kuno’y nadawat nga taho si General Año nga patay na ang Malaysian terrorist busa ginasuta na kini sa militar.
Gikanayon sa Heneral nga nagpadayon ang ilang panawagan sa mga terorista nga mas maayo mutahan na lamang sila gamit ang pagsibya sa mega phone.
Lima ka milyones dolyares ang madawat nga reward money sa impormante nga naghatag og impormsayon sa gitaguan ni Hapilon ug Omar Maute ug laing napulo ka milyon ka pesos gikan sa gobyerno nga karon ginaproseso na.
Atol sa pagbisita sa Eastern Mindanao Command sa Panacan kagabii, kabahin sa pakig-istorya sa Heneral atubangan sa mga sundalo mao ang pagpasalamat sa tanan nagbuhis og kinabuhi sa Marawi City.
Usa ka dakong kadaugan sa armadong kusog sa Pilipinas ug sa gobyerno ang kamatayon nila Omar ug Hapilon diin gikatakda magretiro ang heneral karong buwana human sa 38 ka tuig sa serbisyo.
RadyoMan Joel Viray
