Gihagit karon ni Interior and Local Government Secretary Eduardo Año ang mga partido-pulitikal nga sundon ang ehemplo ni PDP-Laban chief Sen. Aquilino ‘Koko’ Pimentel kalabot sa mga pulitikong buot magpapili sa 2019 apan kwestionable ang integridad.
Sa media interview, gisugilon ni Año nga ilang gikalipay sa executive department ang anunsyo ni Pimentel nga dili nila suportahan kadtong mga personalidad kinsa buot molansad sunod tuig apan kansang pangalan anaa sa narco-list ni Pres. Rodrigo Duterte.
Una niini, nilutaw ang panawagan sa daghanang mga sektor nga i-ban ang mga narco politicians aron dili makabaton sa poder pinaagi sa pagdaug sa piniliay gamit ang pondong salapi nga gikan sa iligal nga drogas.
Sa pikas bahin, gipasalig karon ni Año nga iya nang gimando sa nasudnong kapulisan nga sugdan na ang deployment sa mga personahe sa kapulisan ngadto sa mga identified election hotspots.
“We don’t want any more killings, just like the killing of Judge (Edmundo) Pintac,” segun sa kalihim.
Ang mahistrado maoy naggunit sa ‘drugs and firearms cases’ kontra kang suspected drug personalities Nova Princess ug Reynaldo Parojinog Jr, apan gibugha-patay sa mga wala mailhing motorcyle-riding suspects sa Ozamiz City kagahapon.
Sa entero nasud, mokapin 7,000 ka mga lokalidad giila nga Areas of Concern kun election hotspot areas diin mokapin 800 ka mga munisipalidad nalakip niini.
Sa maong talaan, nag-una ang ARMM gisundan sa Central ug Eastern Visayas Regions.
RadyoMaN June Duterte
