Kumpirmado karon sa Armed Forces of the Philippines (AFP) nga usa na lamang ka miyembro sa Maute brothers ang nagpabiling buhi sa main battle area sa Marawi.
Matud ni AFP Chief of Staff Gen. Eduardo Año nga base sa ilang nakalap nga intelligence information, si Omar Maute na lamang ang gikatahong nagpabilin sa war front ning mga tungora.
Dugang ni Año nga si Fr. Chito ug uban pang mga bihag nakasinate sa dili ti-aw’ng malisud nga kahimtang kun ‘harsh conditions’ samtang anaa pa sa kamot sa mga teroristang Maute-ISIS.
Misyon karon sa kasundaluhan nga masikop ug mabilanggo si Isnilon Hapilon, ang giilang emir kun lider sa ISIS sa Marawi area nga buot nilang i-konvertir ngadto sa pagka-caliphate sa ilang krusada ang area.
Gikatakda pa karon nga mahimamat ni Pres. Rodrigo Duterte ang gawasnon na nga Vicar General sa Marawi City kinsa padayon pang gipailawom sa debriefing process.
RadyoMan June Duterte
