Apartment gitamnan og marijuana, nadiskubre sa NBI XI

Davao City- Nadiskubre sa National Bureau of Investigation (NBI XI) Southern Mindanao Office ang lima ka kaang nga gitamnan og marijuana sa usa ka abandonadong apartment sa usa ka subdivision sa Barangay Catalunan Pequeño, Davao City.

Matod ni NBI XI Head Agent Vicente Essex Mingues, bandang 2:30 sa hapon kagahapon adlawa (July 25, 2023) usa ka tawag ang ilang nadawat gikan sa tag-iya sa apartment ug nagpahibalo nga dunay nadiskubre ang iyang mga panday og lima ka kaang nga gitamnan og marijuana.

Tiyorya ni Mingues nga mag-usa na ka tuig sukad gitanom ang maong marijuana, ug makapila na higayon gikonsumo sa wala mailhing suspek o mga responsable diin dako ang pagtoo sa opisyal nga anaa lang sa palibot sa komunidad ang nagtanom sa mga marijuana.

Giingon pa sa Head Agent nga wala na nila pasaka-i og kaso ang tag-iya sa apartment sanglit wa kini masayod nga gitamnan na diay og marijuana ang iya nga balay ug nadiskubre ang tanom sa mga marijuana dihang gi-renovate pa ang apartment.

RadyoMaN Joel Viray