Apat ka dumulo-ong nga nadakpan sa entrapment sang NBI 6, ginkasohan na; 42 million pesos, nataban sa negosyante

144
ILOILO CITY –  Gikasohan na sa City Prosecutor’s Ofiice ang gin-aresto sang National Bureau of Investigation ukon NBI Region 6 nga lima ka mga suspek sa kaso nga syndicated estafa pinaagi sa ginlunsar nga entrapment operation sang nakaligad nga biyernes sa City Mall Parola.
 
Ginhimo sang NBI 6 ang entrapment operation matapos nagreklamo ang negosyante nga si Marcelina Borda, balo sa bana nga British, residente sang barangay Agsanayan, Buenavista , Guimaras nga ini siya ang biktima sang pagpanonto kon sa diin naglab-ot sa 42 million pesos ang nakuha sa iya sang mga suspek.
 
Ginkilala ang utok sang sindikato nga amo si Stephen Desmond Nelson nga ang matuod nga ngalan amo si Ogba Peter Amawhe, isa ka Nigerian, apang nagpakilala nga British kag chatmate sang tagreklamo, nga karon wala pa madakpan.
 
Naaresto ang lima nga ginalakipan nanday Rosalyn Ibarra  sang Cavite, Francis Onyebuchi Amadi kag Chukwudi Ugwu lunsay Nigerians kag Sitti Faridah Binti Abdul Hamid kag Ishama Binti Sheck Dawood nga lunsay Malaysian nationals matapos ginsugo ni Nelson nga magkadto sa Iloilo.
 
Base sa reklamo ni Borda, nakilala niya sa isa ka dating site  ang nagpakilala nga si Stephen Desmond Nelson kag sa sulod sang walo ka bulan nangin malapit ang iya buot diri tubtob nagsugtanay sila nga magtukod sang oil business sa Iloilo kon sa diin nagpadala siya diri sang 16 million pesos para sa pagproseso.
 
Ginpahayag nga gin-hack man sang mga ini ang iya bank account kag nakuha ang 10 million pesos.
 
Gindugang pa sang tagreklamo nga nagduda na ini matapos wala gihapon matigayon ang plano bisan naglipas na ang binulan kabangdanan nagreort ini sa NBI.
 
Bangud sini, nagset-up sang entrapment operation ang NBI 6 nga nagresulta sa pagkadakop sang mga suspek.
 
 
 

Facebook Comments