Napatay gid ang apat ka pinalangga nga ido sang pamilya Casidsid sa sunog nga nagluntad kagab-i, Enero 14, 2019 sa Zone 3, Barangay Taal, Molo.
Suno sa tag iya nga si Angelo Casidsid, naghingagaw sila gwa kag iya ginbuksan ang pertahan para may agyan pa gwa ang apat nila ka ido apang nagsulod ang mga ini sa kwarto kag didto tanan nagpanago.
Dugang pa ni Angelo nga balikon pa kon tani niya ang apat ka ido kag ipang itsa sa pihak nga pader para makadalagan ang mga ini palagyo apang wala na siya ginpasugtan nga magsulod.
Pagdeklarar nga fireout, gilayon siya nagdalagan pabalik sa ila balay kag gintotoy ang iya mga ido apang wala gid sang bisan isa nga nagpalapit.
Iya na lang nakit-an ang apat ka ido nga nagatulupad sa sulod sang kwarto kag lunsay sunog.
Suno pa sa iya nga ang pinakatigulang sa apat ka ido ang iya napulutan sa kilid sang dalan bangud dyutayan lang maipit .
Iya ini ginsapupo asta nga nga nagdako kag nagbata.
Suno kay Angelo, ginakabig na nila nga miyembro sang ila pamilya ang apat ka ido apang bangud sa nagluntad nga sunog, wala na sila sang may mahimo kundi batunon nga lang nga wala na ang ila pinalangga nga mga ido.
