Apat ka mga pulis ang patay kag 28 ka iban pa ang pilason matapos mahulog sa pil-as sa Barangay Genomoy, Alimodian, Iloilo pasado ala-una kaina sang hapon ang ila ginasakyan nga dump truck.
Suno kay Police Lt. Col. Joem Malong, spokesperson sang Police Regional Office 6 nga pabalik na sa ila headquarters sa 601st Regional Mobile Force Battalion ang mga pulis nga ginapamunuan ni Police Captain Bonifacio Alabe Jr. matapos maghiwat sang minor operation apang sa pag-abot sa taklaron nga bahin sang Barangay Genomoy, nag-malfunction ang truck kag nagdulhog ini paisol tubtub nahulog sa pilas nga ginabanta nagataas sang 100 ka metros.
Wasak ang nasambit nga truck nga gintunaan sang kamatayon sang apat ka pulis kag pagkapilas sang 28 pa ka iban.
Ginkilala ang mga napatay nga sanday Police Corporal Emerson Peniarubia; Patrolman Rex Agupitan; Patrolman Antonio Tumanday kag Patrolman Prince Angelo Supiter.
Samtang ang mga pilason ang ginpangdala sa nagkalain-lain nga ospital sa siyudad sang Iloilo kon sa diin lima ang gindala sa Iloilo Saint Paul’s Hospital, 17 sa West Visayas State University Medical Center, 3 sa Iloilo Mission Hospital samtang 3 naman ang out-patient.
Suno kay Malong nga lubos nga ginakasubo sang PRO-6 ang panibag-o nga kahul-anan sa mga pulis bangud halos wala pa sila maka-recover sa pagkadula sang duha ka opisyal nga sanday Police Captain Efren Espanto Jr. nga napatay sa ambush sang NPA sa banwa sang Janiuay sang Pebrtero 12 kag Police Col. Marlon Tayaba nga napatay bangud sa balatian nga cancer sang Pebrero 16.
