APL: Kapobrehon nagpabilin

20

Davao City – Gisaway karon sa Alliance of Progressive Labor (APL) ang kapakyas sa pagpatuman sa saad sa administrasyong Duterte nga humanon ang contractualization kun Endo nga maoy usa sa mga sukdanan kung nahaw-as ba o wala ang mga Pilipino gikan sa kalisud ug kapobrehon.

Segun ni APL Secretary-General Joshua Mata, daghan gihapon sa mga trabahador ilawom sa contractual basis sa pagpanarbaho ug ehemplo niini ang liboan ka job workers sa mga buhatan sa lokal ug nasudnong gobyerno ingon man diha sa mga pribadong kumpanya.


Ang walay kasegurohan sa estado sa pagpanarbaho sa mga Pinoy naghulagway sa matuod nilang kahimtang nga daghan gihapon sa pamilyang Pilipino nagkamang ug nakigbatok sa kawad-on,matud ni Mata.

Nasabtan ni Mata nga adunay gigamit nga sukdanan ang Social Weather Station (SWS) sa ilang survey apan ang maong survey wala magsulti sa matuod nga sitwasyon sa mga kabus kun miangat ba o wala ang kinabuhi sa kadaghanan ilawom sa Duterte regime.

Alang kang Mata, ang tinuod nga sukdanan kadtong daghan ang maglipay sa oportunidad ug makatilaw sa maayong panglawas, pag-angkon og kaugalingong pinuy-anan, paglambo sa kinabuhi, pag-eskwela sa kabataan ug uban pang butang.

Dili mabasol ni Mata ang pagkapyot sa ubang Pinoy sa gitawag nga ‘kapit sa patalim’ nga bisan og walay kasegurohan mamahala na lang basta makagawas lang sila sa kalisod nga sa taas nga panahon nilang pag-antos.

RadyoMaN Joel Viray

Facebook Comments

From Advertisers