Apohan sa rape victim dismayado sa pagkalingkawas sa uyoan sa kaso

Davao City – Dismayado ang lola sa rape victim nga nakalingkawas sa kaso ang uyoan, samtang ang lolo lamang ang naduot, kini subay sa resolusyon nga gipagula sa piskaliya dili pa lang dugay.

Dili madawat ni Lola Inday, taga-Marilog District, Davao City, ang nahimong hukom sa piskaliya, human gibasura ug wala masaka sa korte ang kasong lugos batok sa Uyoan, kansang mi-unay pag-among-among sa kaugalingon niyang pag-umakon nga 15 anyos nga dalagita.

Subay sa resolusyon gipasabot niini, dili mahimong maapil sa kaso ang uyoan sa iyang lolo ilabi na nga menor de edad pa ang maong suspetsado (uyoan). Nakahukom ang piskaliya nga ang apohan na lang una, ang unahon sa pagtaral sa korte.

Plano karon ni Lola Inday nga pa-imbestigahan pag-usab ang uyoan, aron adunay rason nga mapa-ubos sa assessment sa City Social Welfare and Development Office (CSWDO) kung tinuod ba nga menor de edad o dili ang unang akusado.

Nahiubos usab si Lola Inday sa amahan sa biktima, kay daw wala kini nagpakabana sa nahitabo sa iyang anak ug mas mipatigbabaw pa ang gibati niini ngadto sa iyang amahan ug igsoon (mga akusado) kaysa sa iyang kaugalingong anak.

RadyoMaN Joel Viray