Davao City – Daku ang posibilidad nga gipahimuslan sa mga water concessionaires ang El Nino phenomenon kun panahon sa tinghuwaw aron ipagawas nga nag-atubang sa krisis sa tubig ang nasud karon.
Gibatbat ni Davao City Second District Councilor Dante Apostol nga ang tumong sa water concessionaires mao ang pag-manipular sa mga konsumante nga duna krisis sa tubig-mainum karon tungod sa huwaw.
Matud ni Apostol, kung mulampos ang mga water concessionaires sa pagpatoo sa publiko nga nagkuwang ang supply sa tubig, masayon na lang kanila ang pagduso sa pag-usbaw sa singil sa magamit nga tubig.
Wala matuman sa mga suppliers ang ilang saad nga serbisyo sa patubig alang sa katawhan kay mas gi-una pa nila ang pag-ginansiya og daku kay sa gikinahanglan sa mga tawo.
Busa pabor si Apostol sa lakang karon sa nasudnong panggamhanan nga i-takeover na ang kadumalahan ug operasyon sa mga concessionaires sa tubig sama sa pribado ug water districts sa nasud.
Giklaro ni Apostol nga sa karon wala pa’y opisyal nga baruganan ang konseho ning siyudad labot sa laraw sa gobyerno nga bakwion ang operasyon sa patubig aron ang kabalaka sa mga konsumante mawagtang.
RadyoMaN Joel Viray
