Ivisan, Capiz – Wala na makapalag pa sang ginserbehan sang warrant of arrest sang mga otoridad ang isa ka Indian national nga nagapangatubang sang kaso nga 2- counts of rape samtang ini ang yara nagatinir sa Poblacion Norte banwa sang Ivisan, Capiz.
Ginkilala ang akusado kay Navjot Singh, 27- anyos ang pang-edaron kag temporaryo nga naga-istar sa nasambitan nga lugar. Ini ang may standing warrant sa kaso nga 2-counts of rape bangud sa pagpanghimulos sa empleyado sang lending company sang suspek.
Ang warrant of arrest sini ang gin-issue kag pirmado ni Judge Lorenzito Diaz sang RTC Branch 17, Roxas City kun sa diin wala sang piyansa nga ginrekomendar ang hukmanan para sa temporaryo sini nga kahilwayan.
Samtang, wala naman nadakpan nag kaupdanan sini nga akusado nga nakilala kay Pretpal Singh alias Tony Singh bangud nga insigida nakapalagyo pabalik sa pungsod India antes pa man ginpapanaug ang warrant of arrest kontra sa ila.
Nangin madinalag-on ang joint operation paagi naman sa bulig sang PNP-Anti Kidnapping Group(PNP-AKG) kag Ivisan Municipal Police Station.
