Kasunod sang pagka-aresto sa Lebanese national nga si Nadder Essam Assaf sa Lebanon, principal suspect sa pagpatay sa Ilongga OFW nga si Joanna Demafelis, ginkumpirmar sang Deparetment of Foreign Affairs nga nadakpan naman ang isa pa ka suspek nga si Mona Hassoun.
Suno kay DFA Secretary Allan Peter Cayetano, ginauyatan na sang Syrian Authorities si Mona Hassoun, asawa ni Assaf nga mga amo ni Joanna sang magtrabaho ini sa Kuwait.
Ginpat-od ni Cayetano nga karon nga nadakpan na ang mga kriminal, maangkon na ang hustisya sa pagkapatay sa Ilongga OFW.
Sa pagkamatuopd suno sa iya, ginahanda na nila ang isa ka mabakod nga kaso batuk sa duha ka suspek base man sa direktiba sa ila ni Presidente Rodrigo Duterte.
Una diri, nahulog sa kamot sang mga otoridad sa Lebanon si Assaf nga nag-ako naman sa nasambit nga krimen.
Madumduman nga sini nlamang nga bulan sang masapwan ang bangkay ni Demafelis nga masobra isa ka tuig nga nasulod sa freezer sa isa ka abandonado nga apartment sa Kuwait.
