Davao City – “It’s too late to apologize”.
Kini maoy giingon sa usa ka bag-ong lingkod nga Sangguniang Kabataan kun SK kagawad human nasikop ug giangkon ang pagkalambigit niini sa iligal nga droga.
Sa pakighinabi sa DXDC RMN Davao kang Hideki Nuchefranca Hernando, 21 anyos, SK kagawad sa Barangay 18-B ning syudad, nangayo kini og pasaylo sa iyang ginikanan ug mga kabatan-unang giserbisyuhan sa ilang barangay.
“Natagam na gyud ko karon, mag bag-o gyud ko. Sa tanang niboto sa akoa, pasayloa ko ug ayaw ko ninyo sundaga,” segun sa SK kagawad.
Kahinumduman nga naaresto ang SK kagawad ug lain pang duha ka lalaki atol sa gipahigayong buy bust operation sa kapulisan alas 5 sa buntag kagahapon sa Iñigo Street, Brgy 18-B, Bo. Obrero ning syudad diin nakuha gikan kanila ang mga gituohang marijuana nga mokantidad og 500 pesos.
Balhug na sa prisuhan ang dinakpan ug mag atubang og kasong adunay kalapasan sa Republic Act 9165 kun Comprehensive Dangerous Drugs Act of 2002.
RadyoMaN Renz Barbarona
