Cuatro maga Calibre 30 M1 Garand Rifles y sinco clips con 40 rounds de mana bala el ya entrega el officales del brgy Arena Blanco con el tropa del 11 Infantry (Lapu-lapu) Battalion bajo na operational control del Joint Task Force Zamboanga, del ayer por la tarde na mismo brgy hall del mencionao baranggay donde mismo si Capitan Mujib Mohammad Abdulhusin el ya encabesa con el turned over.
Este movimiento di Capitan Abdulhusin ya bene despues ya hace esfuerzo el mismo Battalion Commandante del 11 Infantry Battalion si LTC Rolando P. Gomez Inf (GSC) PA para enforsa con el orden del Department of Interior and Local Government (DILG) prohibi con el maga brgy tanod carga y usa armas de fuego donde man cuento y ya hace le entende con el maga officiales sobre con el maga provision del Acto Republica 10591 el mas conocido Comprehensive Firearms and Ammunitions Act of 2012, donde estipulao que que jinde otorisao el maga baranggay tanod para carga armas de fuego, y responsibilidad del capitan para asegura que ninggunus del su maga tanod el que ay usa armas de fuego maskin na hora del diila duty.
Ta aparece tambien que nohay maga pertinente documento y jinde registrao el cuantro maga calibre 30 M1 Garand Rifles,donde tres (3) Springfield Armory bearing SN 334676, 828706 and 684235; y un (1) Winchester bearing SN 109837 base na verification que ya hace el 11IB na propio y concierne AFP unit.
El maga mencionao armas de fuego ta esta na custodia del 11IB por el propio disposition.
