MANAPLA, NEGROS OCCIDENTAL – ( 2nd UPDATE) Apat ang nagkalamatay sa natabo nga buybust operation sini gid lamang nga aga sa Brgy. Sta. Teresa.
Nakilala ang mga suspek nga amo sanday Alson Aguirre, tumandok sang Silay City kag ginasiling leader sang amo nga grupo, Ruben Pinoy, Alyas Totong Torres sang Brgy. Sta. Teresa kag Reynante Sombero sang Taytay Begonia, Brgy. Purisima, tanan sang Manapla
Ang buybust ginpatigayon sang mga katapo sang Manapla Municipal Police Station pasado las 7 sini gid lamang nga aga sa Had. Bariw, Brgy. Sta. Teresa, Manapla.
Suno sa pulis nga pila ka bulan na nga gina monitor ang mga suspek kag kaina sang aga ginpatigayon na gid man ang operasyon kon diin nagbato ang mga suspek gani ini sila ang natiruhan kag nagkalamatay.
Nakuha sa mga suspek suspected shabu nga may market value nga kapin sa P1.386 million pesos subong man 2 ka long firearms kag 3 ka short firearms lakip na ang mga bala./DYHB NEWSROOM
