Roxas, ZDN-Tungod sa daghanan kaayong hangyo sa mga lideres sa Hugpong ng Pagbabago (HNP) sa lungsod sa Roxas ning lalawigan sa Zamboanga del Norte, nakahukom na si Jun Yebes ang anak ni kanhi Governor Rolando E. Yebes nga magpapili isip Mayor sa lungsod sa Roxas ning lalawigan sa Zamboanga del Norte.
Ang hukom nakab-ot ni Jun Yebes human madawat ang daghanan kaayong mulo ug reklamo gikan sa mga katawhan sa nasangpit nga lungsod.
Ang batan-on nga Yebes nagkanayon nga dili niya pwede nga talikdan ang nagapadayong reklamo kabahin sa mga walay nakita nga kausaban matod pa sa kahimtang sa panimuyo sa katawhan sa iyang lungsod.
Dugang pa niya nga sa dugay nang mga katuigan nga paglingkod sa kasamtangan nga Mayor sa Roxas, walay Makita ang katawhan kon asa napadapat ang buhis sa katawhan ug misamot kalisod ang panimuyo ilabi na sa kabukiran.
Gusto ni Jun Yebes nga maundang ang walay hunong nga pagpanamastamas sa mga rekursos naturals, pagdaug-daug sa mga lumolupyo sa Roxas, pag negosyo sa kwarta sa munisipyo ug ang pag-ilad sa mga miembro sa Senior Citizens, Pantawid Program sa National Government ug daghanan pa.
Siya midugang nga samtang milambo ang panginabuhi sa mga Opisyales sa lungsod, ang mga yanong lumolupyo sa Roxas nag ila-id sa tumang kalisod.
Sama sa iyang amahan nga kanhi Gobernador, si Jun Yebes adunay kasing kasing alang sa mga kabos, mga panglantaw aron mahaw-as sa kalisod ang mga lungsuranon ug labaw sa tanan andam nga motabang sa mga nanginahanglan sa iyang panabang.
