Nagplano ang Arsobispo sa Sugbu nga si Jose Palma pagduaw sa haya sa lalaki nga napatay sa shootout sa Archbishop`s Palace kagahapon .
Ang liason officer sa Cebu Archdiocese nga si Msgr. Joseph Tan nibutyag nga nahinabi sa Arsobispo pinaagi sa telepono ang amahan ni Jefrey Mendoza Cañedo nga si Retired Police Inspector Feliciano Cañedo human sa nahitabo kagahapon .
Matud ni Tan nga si Palma mohatag ug hinabang ngadto sa pamilya ni Cañedo ug moduaw sa haya sa higayon nga mabalik na kini sa Sugbu karong adlaw nga Biyernes .
Gikan sa gitambungan nga panagtigum sa kaobispohan didto sa Manila nilahos si Palma sa Cotabato aron motambong sa ordinasyon sa usa ka bag-ong Obispo ug mabalik kini sa Sugbu karong biyernes.
Sa pikas bahin matud ni Tan way himoon nga dakung kausaban sa seguridad sa Archbishop`s Residence human sa insidente gawas lang sa pagdugang ug mga CCTV camera ug ang pagbutang ug pipila ka police personnel subay sa mando sa Police Regional Office -7.
