Dimataling, Zamboanga del Sur – Nakaangkon ug samad pinusilan ang usa ka babaye human gipusil sa iyang kaugalingong bana kagahapon sa alas 12:30 ang takna sa kadlawon sa Sitio Samalan, Barangay Balanagan, Dimataling, Zamboanga Del Sur.
Ang biktima mao si Emily Tolentino Calibo, 31 anyos, asawa sa suspetsado, samtang ang suspetsado mao si Jomar Jacob Calibo, 32 anyos, usa ka CAFGU member ug pulos sa residente Sitio Samalan, Barangay Balanagan, Dimataling, ning probinsya.
Sa imbestigasyon sa kapulisan gibutyag nga sa wala pa ang naasoyng pagpamusil, ang biktima ug ang suspetsado nalingaw sa pangpang disco sa Sitio Plaza sa naasoyng lugar. Samtang sila naglakaw pauli, adunay panaglalis tali sa biktima ug sa suspetsado hangtud nga naabot ang biktima sa balay sa iyang mga ginikanan ug didto gisundan siya sa ug gipusil sa iyang bana.
Ang biktima nakaangkon ug usa ka samad pinusilan sa iyang wala nga batiis pinaagi sa gitahapang Calibre 9mm nga pistola base sa usa ka basiyo sa bala nga giturn-over. Ang biktima daling gidala sa Chavez Clinic, Dinas, Zamboanga Del Sur alang sa dinaliang pagtambal samtang ang suspetsado boluntaryo nga mitahan sa iyang kaugalingon sa Dimataling MPS sa pagka alas 6:30 sa buntag kagahapon.
