Asawa kag hinablos patay, apat pilason sang nag-amok ang isa ka amay sa Ilog

87

ILOG, NEGROS OCCIDENTAL – Asawa kag hinablos patay, apat ka iba pa ang nasamaran sang nag-amok ang isa ka amay sini gid lamang nga aga sa Brgy. Balicotoc, banwa sang Ilog.

Nakilala ang mga biktima nga sanday Milerna Magbato, 55 anyos, asawa sang suspek kag ang iya hinablos nga si Ryan Ulitan, 18 anyos, lunsay pumuluyo sang amo nga barangay.


Ang suspek naman ginkilala nga si William Magbato, 55 anyos, residente man sang amo nga lugar.

Suno sa isa ka barangay kagawad sang amo nga lugar nga si Kagawad Soligon, pasado las 7 kaina sang aga, nakibot ang tawo sa palibot sang hinali na lamang nga nag-amok ang suspek, bitbit ang binangon.

Una nga ginlabo sang suspek ang iya asawa kag ang iya hinablos nga nag-angkon sang patal nga pilas nga amo ang gintunaan sang ila kamatayon.

Wala pa nakuntento ang suspek, iya pa gid sini ginpanglabo ang mga tawo nga iya masugata kon diin apat diri ang nasamaran.

Ini sila ginkilala nga sanday Jessie Teranes, 50 anyos, Janice Elamparo, 33 anyos kag ang duha ka mga barangay kagawad nga sanday Leonilo Balsomo Sr. kag Demjoy Tiaga.

Ginpahayag nga una nga nag-respond ang mga katapo sang Philippine Army bangud yara lang sila sa area kag natiruhan ang suspek apang kibyas gid lamang ang igo sini kag detained siya subong sa Ilog Municipal Police Station.

Sa karon gina-imbestigar na sang pulis ang matuod nga natabo apesar ginsiling sang mga malapit sa suspek nga ini siya ang naghilanat gali kagab-i kag sa iya pagbugtaw sini nga aga, amo na ang sitwasyon sang suspek.

Facebook Comments

From Advertisers