Polanco, ZDN-Patay ang usa ka ginang human kini giluba sa iyang kaugalingong bana, didto kini nahitabo sa may brgy. Pian, Polanco, Zamboanga del norte, mga 5PM niadtong adlawng martes.
Ang biktima mao si Erlinda Natial Lumacang, 42 anyos, kinsa giluba sa bana nga si Leofer Intic Lumacang, hingkod ang pangidaron.
Sa gihimong makuti nga imbistigasyon sa kapulisan sa polanco nasayran nga kining asawa nanguha kini kangkong didto sa Layawan River nahimutang ra usa sa maong barangay.
Niadtong higayona kining asawa uban usab niya ang iyang bayaw nga babaye atol sa ilang pagpanguha ug kangkong, apan mi una ug pauli kini iyang bayaw nga si Felicitas, wala pa gani kini nakaabot sa iyang balay nakadungog kini ug makusog nga syagit gikan sa suba.
Mao nalang iyang nalingian nga gidunggab na kini sa bana nga si Leofer, dali kini niyang giadto aron sulayan pag tabang apan, gibaharan sab kini nga apilon, hinungdan nga mikaratil kini ug dagan padulong sa ilang silingan aron mangayo ug tabang.
Gisulayan pa ug dala ang biktima sa balay tambalanan apan patay na kining nahidangat human naka angkon ug 12 ka dinunggaban sa nagkadaiyang parte sa iyang kalawasan.
Human sa pagpangluba, matod pa misulay ug hikog ang responsable pinaagi sa pag dunggab sa iyang kaugalingon, nakaangkon pa kini ug tulo ka nilubaan sa iyang tiyan.
Matod pa sa hepe Polanco nga si PCPT ARCELITO DERAMA, nga walay nakitang motibo sa pang pagluba, pero gibutyag niini nga ang suspetsado, hubog niadtong higayona sa dihang iyang gihimo ang pagpatay sa iyang asawa.
Sa kasamtangan tanggong sa bilangguan nga puno sa pagmahay ug mag atubang pa sa kasong pagpatay sa iya mismong kaugalingong asawa.
