Ungkaya Pukan, Basilan- Ya rindi este na 18th Infantry Battalion el considerao aka-21 na lista del ASG Wanted del provincia del Basilan identificao como si Bin Ajalan alias Kurerep Usuluddin, que donde ya rindi tambien le con el un M16 con M203 grenade launcher.
Si Ajalan ya decidi rindi su cuerpo na otoridad con el miedo que mismo asegun el su familia o bisinos el quien ay ensinia conele na otoridad por causa con el grande cantidad ya offrece el govierno en cambio con el su aresto, y novaya ay muri tambien le durante el encuentro entre el maga militar como cosa ya sucede con su hermano si Mudzri Usuluddin que miembro tambien del ASG y ya sale muerto del año 2016 durante el fuerte bakbakan.
Base na cuento di Ajalan, por causa na pobresa ya decidi sila tres man hermano sigi na bandido grupo Abu Sayyaf despues que ya offrece canila dinero el grupo. Ya admiti si Ajalan que imbuelto le na maga bakbakan entre el diila grupo y militar del maga años pasao. Antes pa men ele ya decidi rindi na militar, ya man una ya yaman surrender el su hermano si Jabir Ajalan con el maga personajes siempre del 18th Infantry Battalion na Tipo-Tipo, Basilan.
El rindida di Ajalan parte pa siempre del sin descanso esfuerso del militar na mencionao provincia para intensifica el campanya contra terorismo, y del ayuda del govierno local.
Semehante con el maga miembros del bandido grupo quien del mas temprano ya decidi rindi na otoridad, ay dale tambien assistencia financial con Ajalan paraber puele le prinsipia nuevo vida. El 18th Infantry (Deo et Patria) Battalion ta continua tambien apela con otro maga miembros del bandido grupo para descansa ya con el maga acto de terorismo que amo el ta manda sufri con el maga inocente civilian y entero comunidad del provinica del Basilan.
