Pagadian City – Hingpit na nga natugyan sa Department of Agriculture Region 9 ngadto sa mga mag-uuma dinhi sa probinsya ang mga makinarya ug ekwipo sa pagpanguma kagahapong adlawa.
Usa ka Mass Turnover of Farm Machinery and Equipment ang gipahigayon sa Department of Agriculture sa Regional Field Office 9 Covered Court dinhi sa syudad sa Pagadian.
Present sa maong programa si Governor Victor J. Yu, Konsehal Jigger Ariosa kinsa naghawid sa Komitiba sa Agriculture, Fishery and Agrarian Reform, mga opisyales sa DA ug mga mag-uuma sa nagkadaiyang kalungsuran.
Nakapahimulos sa rice mechanization program ang mokabat 55 ka mga farmers’ associations dinhi sa syudad ug sa mga kalungsuran nga sakop ning probinsya sa Zamboanga del Sur.
Lakip sa mga makinarya ug mga gamit sa pagpanguma nga gitugyan ngadto sa mga benepisyaryo mao ang hand tractors, mud boats, rice reapers, rice combine harvesters, rice threshers, ug mga mobile recirculating dryers.
Tumong sa maong programa ang pagpausbaw sa produksyon sa umahan, paglikay sa kapakyasan sa pagpanguma, pagpugong sa climate change ug ang pagtabang sa paghatag ug dugang kapanginabuhian sa mga mag-uuma dinhi sa probinsya.
(Credit to Department of Agriculture ZAMPEN)
