Davao City – Wala ma-uyoni sa Parents Mobilization Action Group ang nahimong hukom sa Ateneo De Manila sa pag-dismiss sa estudyanteng si Joaquin Montes kinsa nangbully og kapareho nga estudyante.
Matud ni PMAG President Febe Matthew, sobra ra pod kaayo ang gipakanaug nga desisyon sa liderato sa Ateneo nga muabot pa sa punto nga i-dismiss si Montes tungod lamang sa bullying incident nga nag-viral sa social media.
Giingon ni Matthew nga sama ra nga gipatay sa maong tunghaan ang kaugmaon sa ‘bully boy’ sa posibilidad nga dili na kini pa dawaton sa ubang tulonghaan nga enrolan niini tungod sa daut nga record nga bullying.
Ang maayo unta nga gibuhat sa pamunuan sa Ateneo mao nga pahamtangan lamang unta og disciplinary action sama sa community service sa eskwelahan gumikan ang dismissal order bug-at ra kaayo nga silot alang kang Montes nga aduna pa untay hayag nga kaugmaon.
Hinoon giklaro ni Matthew nga wala niya konsentiha ang gibuhat ni Montes sa pagpanakit niini sa laing estudyante gamit ang iyang kahibalo sa martial arts.
Angay lamang nga muagi sa ensaktong proseso ang aksyon kontra kang Joaquin diin nagtoo kini nga hayan aduna gayuy lawom nga rason nganong nahimo ni Montes ang maong kasaypanan.
RadyoMaN Joel Viray
