Maayon, Capiz – Nakasalbar ang 12-anyos nga bata nga babaye sa tuyo nga pagpanghimulos sang isa ka 14-anyos nga bata nga lalaki.
Natabo ang insidente sa isa barangay sa banwa sang Maayon.
Pilas sa ulo kag iban nga parte sang lawas ang naangkon sang nasambitan nga biktima matapos ini ang ginhatok-hatok sang labo sang nasambitan nga suspek nga menor de edad.
Base sa inisyal nga imbestigasyon sang mga kapulisan sang banwa sang Maayon, nagalakat ang biktima padulong sa gina-obrahan nga maisan sang iya mga ginikanan sang ini ang ginsunod sang suspek.
Gulpi niya ini gintayaan sang dala nga sanduko(pinandak) kag tuyo nga himuslan apang nakapadlos ang biktima kag nakapangayo sang bulig.
Bangud sa kakibot kag kahadlok, ginlabo sang suspek ang menor de edad nga grade- 6 pupil kabangdanan sang pagkapilas sini sa nagkatuhay nga parte sang lawas.
Ang biktima ang padayon nga ginabulong sa isa ka ospital sa syudad sang Iloilo.
Sa subong yara na sa kostudiya sang Social Welfare and Development Office sang Maayon ang menor de edad nga suspek samtang narekober naman diri ang sanduko nga iya gingamit sa krimen.
<www.avast.com/sig-email?utm_medium=email&utm_source=link&utm_campaign=sig-email&utm_content=webmail>
