Atty. Colmenares nagpanawagan pabay-an ang mga human rights defender nga himuon ang ila trabaho

22

BACOLOD CITY- Nagapanawagan ang kilala nga human rights lawyer kag anay Bayan Muna Representative Neri Colmenares nga pabay-an ang mga aktibista kag cause oriented groups nga himuon ang ila trabaho. Ini bangod, indi sila mga kriminal kag indi krimen ang paghimo sang ila trabaho nga proteksyunan ang tawhanon nga kinamatarong.

Ini ang pahayag ni Atty. Colmenares kasunod sang paglapta sang ginasiling death threats kag listahan sang mga target sa idalom sang Kill. Kill. Kill program partikular ang mga aktibista kag miembro sang cause-oriented groups. Nagapanawagan si Colmenares sa mga otoridad nga tubtob wala sang kaso ang mga aktibista, pabay-an ang mga ini nga tungdan ang ila mga obligasyon.


Samtang sa bahin naman sang Philippine Army, ginapanginwala sang mga ini nga sa ila halin ang pamahog sa mga aktibista. Sa interview sang DYHB kay Major Cenon Pancito III, spokesperson sang 3rd Infantry Division, Philippine Army, tuman ka illogical ang pagpabalo sa mga aktibista, kon target man lang sila nga patyon.

Ginpahayag ni Pancito, nga ang activism ang senyales sang vibrant nga sosyudad. Gin-athag ni Pancito, wala nila ginalagas ang mga aktbista, kundi mga terorista, mga New People’s Army (NPA) nga may intensyon magpatay. Ginpahayag man sang army official nga kon may yara gid man sang pamahog sa kabuhi sang mga aktbista, pwede magpalapit ang mga ini sa Philippine National Police (PNP) agod hatagan proteksyon ang mga ini.

[image: image.png]

Facebook Comments