Davao City – Namatikdan karon sa Southern Philippines Medical Center (SPMC) ang hinay nga pag-ubos sa datos sa mga naigo sa COVID-19 ning ulahing mga adlaw.
Matud ni SPMC Chief of Professional Medical Staff Dr. Ricardo Audan, hinoon dili pa angay gihapon maglipay kun magmaya ang katawhan gumikan padayon gihapon nga adunay matala nga mga insidente ug hinay usab ang pagkunhod sa maong kaso sa atong rehiyon.
Pabor si Audan nga ipabilin gihapon sa General Community Quarantine (GCQ) ang Davao City sanglit lisod gayud mokumpiyansa ilabi na nga matag karon ug unya, aduna gayuy matala nga kaso sa COVID-19 sa rehiyon.
Matud ni Audan, walay luna ang Modified General Community Quarantine (MGCQ) sa mga lugar nga padayong gilampornas sa pandemic sama denhe sa atong syudad ug sa tibuok rehiyon.
Mas maayong lugwayan pa ang presenteng GCQ classification aron dili maluagan ang control measures nga gipatuman karon gumikan sa kabalaka nga basin mosutoy na unya ang mga kaso sa nasangpit nga virus denhe sa atong dapit kun i-relax ang control measures.
Ang bag-ong containment categorization magdepende diha sa assessment sa Inter-Agency Task Force on the Management of Emerging Infectious Diseases (IATF) ilabi na kung angay na bang mag-MGCQ na ba ang dakbayan sa Davao ug kanait nga mga lokalidad.
RadyoMan Joel Viray
