Davao City- Andam na ang awtoridad panahon nga i-exempt ang syudad sa Davao sugyot nga pagpalugway sa Martial Law sa tibuok isla sa Mindanao.
Sumala ni Task Force Davao Commander Col. Consolito Yecla, preparado sila alang sa giatawag nga ‘security gap’ panahon wagtangon na ang martial law.
Gikanayon ni Yecla nga andam na sila apan kinahanglan og suporta sa lokal nga panggamhanan aron makuha ang suporta sa lumolupyo sa dakbayan sama na lamang sa pagpanday og balaud aron batasanon ang ‘culture of security’.
Usa usab sa ilang gisugyot ang pagpatuman sa conditional gun ban batok sa mga lawless elements nga dili makasulod sa syudad ingon man ang ordinansa sa pagpataas sa piyansa sa mga illegal parkings aron usab malikayan ang terorismo.
Gani suportado usab kini sa Eastern Mindanao Command sukad mipadayag si Davao City Mayor Sara Duterte nga wagtangon na kini.
Sa pikas bahin, gitataw ni Police Regional Office (PRO) 11 spokesperson Pol. Major Jason Baria nga hitsas na ang mga personahe sa PNP pinaagi sa mga simulation exercises nga ginapahigayon diin duna na silay sistema sa security measures sa dagkong patigayon uban ang laing mga security units.
Dugang ni Davao City Police Office (DCPO) spokesperson Pol. Capt. Rose Aguilar nga praktisado na usab ang security package sa kapulisan diin andam sila mu-comply sa unsa may direktiba sa labaw kanila.
Kahinumdoman nga girekomenda ni National Defense Secretary Delfin Lorenzana nga ipalugway ang Martial Law sa Mindanao kinsa uyon nga mamahimong i-exempt na ang Davao gumikan sa kapasidad niini sa paghatag og seguridad sa katawhan.
RadyoMan Jason Amisola
