Ayuda sa mga naapektohan sa pagkatagak sa debris sa Paragon dili abagahon sa barangay

Davao City – Dili abagahon sa Barangay 76-A Council ang ayuda nga gikinahalan sa mga residente sa Purok 46 nga apektado sa hapit matagak nga crane sa gitukod nga Paragon Condo atol sa Magnitude 6.8 nga linog niadtong adlaw’ng Biyernes sa hapon sa miaging semana.

Matud kang Brgy.76-A Kagawad Randy Ponteras, dili maghatag og ayuda ang Barangay kung na danyos man ang balay ug boarding houses sa mga pamilya ug boarders nagpuyo niini kinsa kasamtangang temporaryo nag-istar sa Barangay.

Giingon ni Ponteras, ang kompanya sa Paragon maoy responsibilidad sa pagtunol og ayuda sa mga apektadong pamilya.

Sigun niini, igo na ang natabang sa Barangay ngadto kanila pinaagi sa shelter ug pagkaon sa pila ka adlaw nilang pagpuyo sa Barangay.

Dugang sa Kagawad, lagmit makabalik na sa ilang mga pinuy-anan ug boarding houses, ang 17 ka individual kung mahuman na og susi sa City Engineer’s Office ang lugar kung luwas naba kini puy-an o dili pa.

Nasayran nga naa lang sa kilid ug sa tungod sa construction site sa Paragon Condo ang mga balay nga hapit mahulogan sa crane.

RadyoMaN Joel Viray