Davao City – Daling gidala sa Southern Philippines Medical Center (SPMC) ang usa ka 19 anyos nga babaye nga naila sa pangalang Vermelyn Joyce Henrole Lumba, residente sa may San Isidro, Agdao ning syudad sa dihang na tripan kini sa usa ka grupo sa kalalakin-an ug gidunggab.
Sumala pa sa report sa Sta. Ana PNP nga ang maong krimen nahitabo sa miaging duha ka adlaw diin igo lang matud pa nagtindog ang biktima diha sa may dalang R. Castillo, Agdao kuyog iyang higala nga mao usab ang testigo sa krimen nga gitago sa pangalang Lando, hamtung ang pangidaron ug silingan sa biktima.
Gisaysay sa testigo nga nanggawas matud pa ang usa ka grupo sa kapin kun kulang 15 ka mga wala mailhing mga batan-on gikan sa ‘Barpa’ Leon Garcia, Agdao diin kalit kuno silang giduol sa maong grupo ug gikulata sa walay daghang storya ang biktima ug gidunggab pa gayud sa toong bahin sa iyang likod.
Sa maong insidente dali misibat ang mga kabatan-onan sa wala matino nga direksyun human nakamatikod kini nga gi-report na sa kapolisan.
Sa karon, naghimo na og follow up investigation ang kapulisan mahitungod sa maong insidente aron maila ug masikop ang mga suspetsado.
RadyoMaN Paul Canono
